ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា នៅឆ្នាំ២០២៥ រាជរដ្ឋាភិបាលនឹងទិញផលិតផល តុ ទូ និងសម្ភារការិយាល័យដែលផលិតក្នុងស្រុកសម្រាប់ប្រើប្រាស់នៅតាមស្ថាប័នរដ្ឋ។

ថ្លែងនៅក្នុងពិធី «បិទសន្និបាតបូកសរុបលទ្ធផលការងារពាណិជ្ជកម្មឆ្នាំ២០២៣ និងទិសដៅការងារឆ្នាំ២០២៤» នៅទីស្តីការក្រសួងពាណិជ្ជកម្ម នារសៀលថ្ងៃទី២២ ខែធ្នូ ឆ្នាំ២០២៣ សម្តេចធិបតី បានលើកឡើងថា៖ «ខ្ញុំបានឱ្យរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុពិនិត្យមើល ហើយពាក់ព័ន្ធនឹងការទិញសម្ភារទាំងនោះ ដោយខ្ញុំលើកទឹកចិត្តឱ្យទិញតុ ទូ សម្ភារៈ ការិយាល័យក្នុងស្រុកយើងវិញ»។

សម្តេចធិបតីគូសបញ្ជាក់ថា នេះជាការជំរុញលើកទឹកចិត្តឱ្យមានការប្រើប្រាស់ផលិតផលខ្មែរ និងកាត់បន្ថយការនាំចូលសម្ភារប្រើប្រាស់ពីបរទេស ខណៈក្នុងមួយឆ្នាំរាជរដ្ឋាភិបាលបានចំណាយថវិកាច្រើនក្នុងទិញសម្ភារពីបរទេស តែយ៉ាងណាសម្តេចថាមិនមានការបិទសិទ្ធិក្នុងការនាំចូលសម្ភារៈពីបទេសនោះទេ៕